AF268: 52v

tefrīq ėdüb Petrevārādīn dėmekle maʿrūf nām qalʿenüñ qūrbında [!] Ṭūna üzerinde müceddeden bir cisr‑i ʿaẓīm daḫı qurılmaq fermān olınub ʿubūdet‑i emr‑i ʿālī // varub iki buçuq günde deryā mis̱āl Ṭūna gibi nehr‑i ʿaẓīmüñ üzerinde binā arşunıyla altı‑yüz arşun ṭonbaz sefīnerleri üzerinde // cisr itmāma ėrişdirilüb Ṭūnanuñ qavī mecrāsı maḥallerinde bundan teng ü muḥkem mecārīʾ yoqdur egerçi Süleymān nebī ʿaleyhi s‑selāmuñ // zemān‑i salṭanet ü nübüvvetlerinde nübüvvetleri muʿcizāt‑i berekātiyle dīvler quvvetiyle ṣaḥīfe‑i rūzgārda muʿciz nice ās̱ār vücūd bulduġı tevārīḫlerde // mesṭūr ve elsine‑i nāsda meẕkūrdur lākin bu ās̱ārı ve qudreti görseler engüşt‑i ḫayreti der‑dehān ėtmeleri muqarrer idi // itmāmı ḫaberi pāye‑i serīr‑i aʿlāya ʿarż olunduqda bir ān ve bir sāʿat tavaqquf u ārāma rıżā‑yi hümāyūnları olmayub hemān uġura // ʿazīmet ü teveccüh buyurub dördünci menzilde ʿizzet ü şevketle Vārādīne vuṣūl‑i meymenet‑i ḥuṣūlları müyesser olub hemān ol gün cisrden // mürūr u ʿubūr ve öte yaqasında Segedīn ṣaḥrāsına nüzūl buyurub cisr‑i mezbūruñ ʿarżı daḫı binā arşunıyla on ẕirāʿ olub rikāb‑i // kāmyāb ile ordu‑yi hümāyūnda mevcūd olan ʿasākir‑i encüm‑şümār leyl ü nehār [...] aqub üc gün üc gėcede ancaq geçirilüb // ve ordu‑yi hümāyūnla żarb u ḥarb ve qahr‑i aʿdā içün çekilen ṭoplar ve żarbuzanlar ve barut ve yuvalaq ve sāyir ālāt‑i meteris ve cebhe‑ḫāne // iki günde ve nüzül ve sāyir ẕeḫāyir ʿarabaları ve iḥmāl ü es̱qāli anlar daḫı iki günde gücle mürūr ėdüb lākin şevketlü ve ʿaẓametlü // pādişāh‑i ẓıllu llāh menzil‑i mezbūrda daḫı ārām eylemeyüb menzil be‑menzil ʿazīmete saʿy u himmet ėdüb Segedīn qalʿesine qarīb Senta // dėmekle maʿrūf nām menzile vuṣūl u nüzūlları müyesser olduqda Ḥaṭvāndan tekrār feryādçılar gelüb üç güne dek qalʿeye meded ėrişdi ise // fīhā ve illā qalʿe elden gitdi dėyü ḫaber vėrdükde Ṭemeşvār yaqasından ʿazīmet üzre olan düstūr‑i mükerrem vezīr‑i ṣāḥib‑tedbīr Caʿfer Paşa // ve Tātār Ḫān–i kāmrān ḥażretlerinüñ birāder‑i muḥteremleri ḫalefü s‑selāṭīn Fetḥ Girāy sulṭān edāme llāhu taʿālā iclālühümā ḥażretlerine ulaġ‑ile // ḥükm‑i şerīf‑i cihān‑muṭāʿ gönderilüb ve ordu‑yi hümāyūnda olan vüzerā‑yi kārdān u nāmverāndan müdebbirü ümūri l‑cumhūri l‑ümem Ciġala‑zāde // Sinān Paşa yessere llāhi taʿālā mā yürīd ve mā yeşāʾ ḥażretlerine şām dārü s‑selām ʿaskeri ve ʿumūmen dergāh‑i ʿālī müteferiqqaları ve nice yüz // çāvuş ve qapu qulından niçe biñ tüvānā ve ceng‑āzmā ʿasākir qoşılub hemān ol gün ordu‑yi hümāyūndan ayrılub ilġar ile // ṭarīqe revāne olınub aʿdānuñ defʿine ve qalʿenüñ istiḫlāṣına istiʿcāl‑i tāmm ile ʿazīmet üzre iken aʿdāya cāsūslar varub // üzeriñize ʿaẓīm ʿasker seçildi dėyü ḫaber vėrdükde küffār‑i ḥāksār [!] ol gün var quvveti bāzūya getürüb qırılan qırılsun qalan qalsun dėyü // yüriyişe iqdām ėdüb ḥikmet‑i bārī Ḥaṭvānuñ güzīde dilāverleri muqaddemā çeteye çıqmış bulınub qalʿe muḥāṣara olunduqdan ṣoñra // içerüye girmege ruḫṣat bulmayub ve sancaq begisi mecrūḥ bulınub ṣāḥib‑firāş olmaġla qalʿeye dest‑i furṣāt bulub lākin ʿasākir‑i islāmuñ // teveccüh ü hücūmından küffār‑i ḥāksār [!] [...] olub bir ān ve bir saʿāt ārām u qarāra ṭāqat getürmeyüb ancaq qalʿenüñ baʿżı yėrlerine // āteş vėrüb her birisi perīşān ve diyār‑i dūzaḥ [!] qarārlarına gürīzān olub Sinān Paşa ve Caʿfer Paşa ve Fetḥ Girāy Sulṭān // Ṣolnoq nām qalʿede mülāqāt olduqlarında aʿd[ā]larınuñ gürīḫte ve perīşān ve bī‑nām u nişān olduqların der‑i devlete ʿarż ėdüb // ve seʿādetlü ve ʿizzetlü pādişāh‑i ʿālem‑penāh ḥażretlerinüñ qudūm‑i nuṣret‑lüzūmlarına tavaqquf u ārām üzre olub devlet ü iqbāl u ʿaẓamet // ü iclālle Ṣolnoġa nüzūl buyurduqlarında bālāda mesṭūr olan ṭoplar ve cebhe‑ḫāne üzerinde düstūr‑i mükerrem müşīr‑i mufaḫḫam Rūm ėli eyāletiyle